सोलापूर : ‘ग्रंथालय शास्त्राचे आद्य प्रवर्तक म्हणून डॉ. एस. आर. रंगनाथन यांना ओळखले जाते. १२ ऑगस्ट हा त्यांचा जन्मदिवस ग्रंथपाल दिन म्हणून साजरा करतात. भारताला ग्रंथालय क्षेत्रात जागतिक प्रतिष्ठा प्राप्त करून देणाऱ्या डॉ. रंगनाथन यांचा ग्रंथालयाच्या विकासात मोठा वाटा आहे. देशातील सर्वसामान्यांना ज्ञानाची कवाडे विनामूल्य खुली करण्याचा विचार सर्वप्रथम डॉ. रंगनाथन यांनी रुजवला. तो जोपासण्यासाठी त्यांनी संपूर्ण आयुष्य झिजवले,’ असे प्रतिपादन प्राचार्य डॉ. एस. ए. पाटील यांनी केले.
ए. जी. पाटील अभियांत्रिकी महाविद्यालयात डॉ. रंगनाथन यांची १२५वी जयंती उत्साहात साजरी करण्यात आली. त्या वेळी ते बोलत होते. या वेळी उपप्राचार्य प्रा. व्ही. व्ही. पोतदार व प्रत्येक विभागाचे प्रमुख उपस्थित होते. या प्रसंगी संस्थेचे अध्यक्ष ए. जी. पाटील, सेक्रेटरी एस. ए. पाटील, कॅम्पस डायरेक्टर डॉ. एम. ए. चौगुले यांचे मार्गदर्शन लाभले.
उपप्राचार्य प्रा. व्ही. व्ही. पोतदार म्हणाले, ‘डॉ. एस. आर. रंगनाथन यांचा जन्म १२ ऑगस्ट १९८२ रोजी तत्कालीन मद्रास प्रांतातील तंजावर जिल्ह्यातील शियाली गावात झाला. १९३०च्या दशकात डॉ. रंगनाथन यांनी ग्रंथालयशास्त्राचे कोलन क्लासिफिकेशन, क्लासिफाइड कॅटलॉग कोड, प्रोलेगोमिना टू लायब्ररी क्लासिफिकेशन, थिअरी ऑफ लायब्ररी व रेफरन्स सर्व्हिस अँड बिब्लिओग्राफी या पाच सूत्रमय ग्रंथांचे लेखन व प्रकाशन करून ते दशक विशेषत्वाने क्रांतिकारी ठरवले. १९३१मध्ये प्रथम मद्राससाठी ‘लायब्ररी बिल’तयार केले. ग्रंथालयशास्त्रातील प्रमाणपत्र, तसेच पदविकास्तरातील अभ्यासक्रमाचे प्रारूप तयार केले आणि ग्रंथालयशास्त्र शिक्षणाची मुहूर्तमेढ रोवली.’
ग्रंथपाल एस. बी. लोंढे यांनी सूत्रसंचालन केले. टीपीओ विभागप्रमुख प्रा. एस. व्ही. पाटील यांनी आभार मानले. कार्यक्रमाच्या यशस्वितेसाठी ग्रंथपाल श्री. लोंढे, टीपीओ विभागप्रमुख प्रा. पाटील, बी. डी. हिरेमठ, एस. एस. माड्याळ, एस. एस. जाधव यांनी परिश्रम घेतले.